王敏德（Michael）與馬詩慧的女兒王曼喜（Kayla），前日宣佈出櫃，引起一陣迴響，昨日她在facebook公開感謝支持和愛護她的身邊人，其母馬詩慧公開力挺「無甚麼大不了！」爹哋Michael又點睇？
坦白好勇敢
昨日Michael在尖沙嘴與余文樂緋聞女友Ase出席Jeep四驅車發佈會時，力撐Kayla說：「嘩，囡囡好出名，睇到好多報道，網上成日鋪相，成日喺event度，佢賺好多錢。」Michael不但支持，更大讚女兒坦白承認是同性戀者是有勇氣的行為。
Michael說：「其實呢個世界有好多問題，係思想精神上問題，不過我冇歧視，唔會分黑、白同種族，冇所謂，人就係人，我答你囡囡好brave（勇敢），我覺得佢做得好好，點解佢要隱藏自己，唔係佢自己問題，係人哋思想問題，我好proud of佢，作為爸爸一定support，佢哋唔係做犯法嘢，我OK，佢就係佢。」
Michael表示已見過Kayla的女友Lia：「見過，我等咗好耐，問過好多次，你有partner幾時見面，但囡囡話慢慢唔好咁急，我哋去過食飯，跳舞活動都見過。」他覺得Lia對囡囡很好：「好好，我覺得OK，Kayla好聰明、好sharp、好sensitive、好負責任，知道自己想要乜嘢。」又自言已提醒女兒不要在街親熱。
死撐冇違例
此外，王敏德早前駕直升機降落貝澳泳灘，被泳客投訴和報警，Michael昨日堅稱自己沒錯：「我覺得冇乜特別，其實我冇錯，我唔喺沙灘管制區範圍內。」又解釋當時聽到直升機有問題，好像卡住圍巾，因機上有四人，為安全起見便降落檢查清楚再起飛，案件現時交由律師處理，他說：「我一直安全至上，有一個人想麻煩我都冇法，香港係咁，我都好鍾意投訴。」
採訪：溫敏芝
攝影：仇志德
