JM嘆香檳累闊少吹波仔

【上環荷李活道】文詠珊（Janice Man）日前下午5點幾揸車到上環荷李活道，之後入餐廳同兩男一女high tea，據知着藍衫嘅男人叫Edward，佢係某西班牙餐廳老闆，雖然天都未黑，但JM已經同朋友嘆香檳，其間餐廳外籍員工發現記者影相，衝出嚟兇記者話打人，結果驚動警察到場。
其間，JM嘅兩個男友人發現門外有警察趕車，佢哋就上咗蓮花跑車，警察即刻叫停坐司機位嘅白衫男人，懷疑佢飲咗酒要吹波仔提供酒精呼氣測試，搞咗一大輪終於離去，JM醒目唔揸車，搵咗保母車接載，問佢係咪飲咗酒？JM冇答就急急上車。

JM日前約咗男友人high tea，着熱褲騷長腿引人注目。

天未黑，JM（左）已經約朋友嘆香檳，真係酒逢知己千杯少呢！

JM男友人諗住開走蓮花跑車，點知俾警察懷疑酒駕，要佢落車吹波仔。

日前JM（右）同友人嘆香檳，離去時唔揸車，召保母車接載。

JM識嘅都係有錢仔，呢兩位就同JM嘆香檳，之後揸蓮花跑車離去。

搵圈外情人

另外，前晚JM到中環出席派對，佢話8月去多倫多出席好姊妹婚禮，JM仲處女下海做伴娘，問佢會唔會喺兄弟團搵意中人？佢話可能身份問題好難識朋友，但如非必要都會搵圈外人做男友。
採訪、攝影：吳耀輝、李志明、藍文浩

前晚JM出席派對，佢話8月會做伴娘，希望搵個圈外男友。