女士貪靚怕肥，勢估唔到連堂堂奧運18金得主費斯（圖）都一樣注重身材。呢位飛魚早前宣佈復出，參加今周舉行嘅美國格蘭披治游泳賽亞利桑那站，全世界嘅觀眾梗係拍爛手掌熱切期待啦。不過，佢出席賽前記者會時自爆，重新參加比賽實情係為咗減肥喎。佢話，自己當年出戰倫敦奧運時體重187磅，但收山之後運動量大減，竟然一度肥到225磅咁犀利。