唔講唔知，外表成熟的林雪實際年齡只有49歲，屬龍，稍長近日大熱的美魔女羅霖一歲。際遇因人而異，性格決定命運，14歲正式申請來港，入了戲行由場務做起做到演員，合作過的影帝數不完。佢話未必要有過人之長，但做演員好似做殺手「一招殺到人，殺咗至表演花式未遲」。
撰文：何永寧
陳果導演的電影《那夜凌晨，我坐上了旺角開往大埔的紅VAN》的票房正向着2,000萬邁進，不過有網友對電影改動原著的部份有微言，唯獨戲中林雪所演的紅VAN司機被激讚入型入格。專程由北京回港接受訪問，接拍《紅VAN》的理由很簡單，因為監製錢小蕙跟林雪講，他的角色是由網上一人一票投出來：「咁樣證明大家渴望我做個van仔佬，平時我都好少睇劇本，所有導演劇本都唔睇，今次專登去搵番本原著睇，當然都係睇頭一、兩章。」自問生活化閒時迫巴士、坐van仔是常識吧，林雪借機會去觀摩：「Van仔司機梗係唔同李嘉誠個個咁斯文，『問候』句呢啲語句當然唔少得，亦都難唔到我。」閒時都出口成文，只有對住鏡頭及拍戲時才收斂一下：「『X你！』怕乜呀，林雪講粗口唔係新聞。」
逃學睇電影
同時對於被指是導演杜琪峯「御用」演員，林雪亦欣然接受說：「好，梗係好啦，即係話有事會有人呵護，有個屋企人等你做完嘢，就算外面風大雨大都有地方，令人好有安全感同溫暖。」自言自小就嚮往電影工作，就算逃學都要去看電影，現在人在北京更每日必定要看三部戲才過癮。回想20歲入行做幕後，現在49歲人卻是80歲身體5歲人的智商，好在當年鍾意拗頸，他說：「我好賤㗎，係我叫杜琪峯用我演戲。我凡事都鍾意驗證，喺片場見到人演一個角色，我會覺得『係咪咁演會好啲呢』，演過畀杜琪峯睇，佢又覺得OK喎，就慢慢開始做幕前，呢方面嘅才能多少都有啲與生俱來。」最經典一場是他憑杜琪峯《鎗火》的角色問鼎當屆香港電影金像獎最佳男配角，同場爭男主角獎的就有劉德華，林雪笑說：「嗰時我仲幫緊杜sir做場記，劉德華喺片場就同杜琪峯講笑話『你畀晒啲人拍戲，同我一齊提名，以後冇人同你買飯盒嘞。』」笑聲亦體會到當時林雪的地位卑微。
一招殺到人
林雪表示當年由內地申請來港，一家本意是借香港作中轉再謀外地發展，不過一住下來就30多年不捨得走，但諷刺是近年他又回歸祖國選擇在北京居住，林雪認為是一種生活體驗可以豐富將來演的角色。而令他最感受良多的並不是恩師杜琪峯，而是劉鎮偉的金石良言。早在95年林雪為劉鎮偉擔任製片，到周星馳的電影《功夫》拍攝時，兩人又再碰面，當時劉鎮偉當面醒了林雪一句說話如當頭棒喝，林雪回想說：「佢話：『我見你近日啲戲有啲浮，其實殺人一招就得，先做好一件事再做其他嘢。』呢句說話我回味到今日，真係一招殺到人，我殺咗人先，之後至表演兩個花式人睇都未遲，又啱喎。」
