小記近日獲Nike邀請，到西班牙嘅馬德里出席該體育品牌嘅新鞋發佈會，既然人在這個西班牙首都，當然唔會放過喺場外，採訪皇家馬德里鬥拜仁慕尼黑呢場歐聯4強大戰嘅機會；開波前小記喺市中心太陽廣場遇到3位拜仁球迷，其中兩位分別叫Julian同Thomas預測愛隊作客贏2:1同3:0，另外一位叫Mario就估賽和1:1，不過皇馬禮拜三晚小勝1:0，3位拜仁粉絲就肯定笑住嚟，喊住走啦。
報章盛讚安帥
另外，小記賽前喺巴拿比奴球場外圍閒逛，被10幾位黃牛黨，車輪式兜售波飛，不斷割價推銷之餘，亦見到當地警察對呢場波有幾重視，大批警員響比賽開始前接近7小時已經喺球場外圍佈防，為夜晚比賽前封路做準備。
至於皇馬贏波後，小記第二朝隨手拈來3份當地報章，亦發現當中報道各有不同之處。《La Vanguardia》比較審慎，只係話皇馬喺首回合過後，有些微優勢。另外兩份報章《El Mundo》同《La Razon》，不約而同作出跨版報道，前者話皇馬贏波比數本應不止一球，同時揀咗交出助攻嘅左閘法比奧干查奧為最佳球員；後者就豪稱曾9膺歐洲冠軍嘅皇馬，𠵱家10冠在望，擺明睇唔起衞冕嘅拜仁。
《La Razon》仲喺內頁報道，形容今場為響亮嘅勝利，又話拜仁雖然掌握比賽形勢，但不敵機會主義者、皇馬教頭安察洛堤嘅部署。評分方面，呢份報紙揀咗皇馬中場沙比阿朗素做最佳球員，畀咗呢位西班牙國腳9.5分，話佢今場盡現個性，係皇馬贏波關鍵一員，表現更勝後衞比比、入球功臣賓施馬同埋交出助攻嘅干查奧。至於拜仁陣中評分最高嘅，係中場卻奧斯同隊長拿姆。記者：陳景安
