澳門官司宣判後，劉鑾雄上月將華置（127）交畀33歲阿仔劉鳴煒，劉鳴煒由非執董，升為主席兼行政總裁，人工隨即N級跳。華置噚日公佈，劉鳴煒月薪150萬元，成為「月球人」（即每月賺一球嘅人），未計花紅，年薪1,800萬元，佢之前年薪得24萬元咋。
綜觀其他跟劉公子差唔多年紀嘅富二、三代，人工冇劉公子咁高。好似彤叔長孫、現年34歲嘅新世界發展（017）聯席總經理鄭志剛，去年度年薪1,390萬元，即平均每月116萬元。信置（083）接班人黃永光直情係抵用，年薪只得101萬元，平均月薪8.4萬元，一般金融機構嘅中級管理層可能都有呢個水平。
不過講係咁講，呢班富二、三代係上市公司大股東，每年收取股息以億元計，年報人工只係表面數字啫。