facebook久違的熱鬧，第一張見到在香港的都敏俊，去到第10n張都仲係都敏俊，隔住部手機Samantha都聽見班姊妹瘋狂尖叫，向來崇洋的我，倒想過大海個泳池巧遇碧咸，來個愛的抱抱……講返轉頭，韓國個勢越嚟越勁，手機賣遍全球，班姊妹開口埋口都話要溝韓仔，商家嘛，希望成下個新秀麗（1910），又或者掹車邊做莎莎（178）只係畀車馬費，人出雞你出豉油，正！
金秀賢帶紅Beyond，而韓國化妝品牌受歡迎是不爭事實，除靠品牌的努力，確實是時勢造英雄。綜觀全球化妝品牌，包括韓國，都用同一條方程式，就係個靚仔/女，拎住件產品影張大頭相，完。所以要搵個紅到發紫的，客人一係買代言人，一係人云亦云，即化身成美容博客和短片，當閣下睇完如何將矇豬眼變成卡通眼的人造美女真人示範，可能都有衝動落街買返支，這宣傳在中韓已十分成熟。
金秀賢今次賣的Beyond，是LG旗下的品牌，雖然LG涉足美容行業逾60年，但風頭被手機和電視機業務蓋過，近年形勢逆轉，貴為第二大化妝品製造商的LG生活健康經營溢利增長11%，達4,964億韓圜，收入達4.3萬億韓圜，其中有四成來自化妝品業務，但股價未能夠創新高，全球消費疲弱和品牌能否維持強勁增長都係問題，不過總有啲奇葩頻頻創新高，下回再分解。
Samantha
本欄逢周一、三、五刊出