食完茶餐廳奶油豬之後，美國駐港總領事夏千福成個星期冇upload新相，原來佢呢排未得閒落區，反而連續兩日現身政府總部。八方見到千福BB噚日約12點，同近十位美國國會代表團成員現身政總，佢話自己趕時間，冇答記者問題。
聽聞今次千福BB夾埋其他來自美國嘅成員同環境局官員會面，聽取對方講解香港空氣污染情況、香港清新空氣藍圖、香港資源循環藍圖等，雙方見面大約半粒鐘就鬆人。近年外國公司越嚟越覺得香港空氣質素好差，寧願轉投新加坡開地區總部，怪唔得要嚟聽吓政府有乜嘢對策改善空氣質素。
其實千福BB前日亦都喺人質家屬到達政總嘅差唔多時間現身政總，聽聞千福BB同呢件事無關，只係咁啱喺同一時間同特區政府官員定期會面咋。