蘇施黃因嫌兩個茶包雙倍收費「請廣傳」，開名謾罵酒店和侍應，遭網民狂插丟盡港人面，事後阿蘇在facebook撰文反省，卻沒向被開名指罵的侍應道歉，網民拒收貨繼續發炮狠批，阿蘇即向商台請假，直至昨日才返工開咪。
「樣衰改唔到」
昨午阿蘇在商台接受訪問，試圖平息茶包裏的風波，她否認刻意請假避傳媒：「我唔會咁衰女走咗去，真係約咗家人坐郵輪，我收緊大家資訊呀，從小受訓被鬧唔解釋，因解釋等同駁嘴，細個唔識消化，冇謙虛嘅心同自大狂，𠵱家覺得咁係對自己有着數。」
阿蘇自嘲性格衰過人，聲言會檢討，她說：「好多人同我講要學精啲，講嘢要轉彎，但我唔會，性格衰過人。網民話我樣衰，呢樣我改唔到，但𠵱家五十幾歲喇，小人唔會話你，話你嘅都係貴人。我俾人寵壞咗，但呢件事上我嚴謹咗，我唔係小器嘅人，我會檢討，唔再評論誰對誰錯，我處理得都好愚蠢，其實可以雙贏，可能就好似網民所講，態度唔好有私心，我諗吓係咪為三百幾蚊『㷫㷫哋』？我唔會嬲網民，我會檢討自己。幾十歲人仲唔識檢討自己，就去死啦！」
「下次聰明啲」
不過，阿蘇依然堅持酒店服務態度未達標，她說：「何韻詩都有WhatsApp我，話杭州用三個茶包㖭！但呢個唔重要。講情講理，酒店係啱晒，但我希望佢能夠做到良好優質，代表香港服務態度，佢未達到。打官司我係會輸，佢冇錯，只係大家唔同角度去睇。」
阿蘇還搬出後生時的工作經歷說：「客人即使錯了，也永遠是對的。」問此句是否對侍應講？她想了想，睩大眼說：「我係講畀自己聽，侍應明唔明唔重要。之後會照鬧，鬧得嚟唔會好似今次咁愚蠢，下次聰明啲，希望達至雙贏，今次係雙輸，蠢到不能再蠢。」
採訪：王連連
攝影：陳慧安
網民瘋改：潮文請廣傳
蘇施黃早前在facebook以「請廣傳」，唱衰酒店多收她English tea茶包錢，事後慘被網民圍插。貼文中，她說：「我答你敢收就得！看單！你們真的敢收6杯English tea共$330！」網民即將貼文變成多個版本的潮文，包括美食篇、機票篇、購戲票篇，以及電話上台篇等，如「我上次去M記同佢講漢堡包塊牛肉唔夠厚，可唔可以加多塊牛肉，個收銀話要收雙層牛肉漢堡嘅錢，跟住我話你夠膽就收……一塊牛肉就買起你M記嘅商譽！」
又有網民抽陳奕迅水，將他為世界自然基金會的宣傳相改圖變成：「如果只是要濃一點的茶，我會叫侍應，落一半水，既環保又快捷！」（圖）
