喺港視仲未有牌，兩個免費台又一池死水之際，識睇嘅一定係睇港台出品。最新一套港台製作、警訊系列嘅微電影《毒蘋果》，本周六晚7點港台電視31同翡翠台有得睇喇！
噚日港台搞咗試映會。故事改編自一宗已偵破案件，販毒集團利用中學生運毒，Kabby飾演嘅學生妹喺警察踢竇時墮樓昏迷，「契哥」之後因為毒癮發作被迫加入販毒，被欺壓之下終於頂唔順，向扮演毒品調查科高級督察嘅林文龍爆料，將販毒集團一網打盡。
禁毒常務委員會委員狄志遠睇完大讚套戲夠震撼：「拍劇都係要靠香港電台，其他台（作品）就見仁見智」。佢對套戲有小小意見，第一係希望學生妹最終可以醒番，重新做人；第二就係有關戲中最後登場嘅角色，佢話好少做禁毒服務嘅人仲戴金絲眼鏡。