出戰離島區議會東涌北補選嘅公民黨新星大狀余俊翔，繼早前遭建制派對手梁兆棠騎呢招對付，近日疑遭黨內「無間道」伏擊。話說曾經喺選輸黨副主席後揚言退出公民黨轉投新民黨嘅胡柏麟，最近聯同三名同樣曾揚言退黨、卻至今未辦手續嘅黨友，整咗個「活力離島」組織，成功申請做呢次補選嘅票站調查。
當選舉事務處近日上載相關資料後，「咁啱」有市民就事件向報館投訴，指控公民黨自己做票站調查。公民黨嚴正澄清呢幾位「黨友」近年冇參與黨務、更冇參與今次補選拉票，過去曾傳埋雙掛號信畀佢哋，要求交書面通知辦退黨手續，均無任何回覆。為免外界誤會，公民黨將會到選舉事務處，要求剔除「活力離島」嘅票站調查團體申請，同時呼籲選民補選當日若然要答，就只答港大民調鍾庭耀做嘅票站調查。