呢兩年唔少大企業都係平均加薪4%至5%，佼佼者係長實（001），佢哋七名執行董事舊年劃一加薪5%，不過另一間大發展商恒基地產（012）就唔同，根據公司最新嘅年報，雖然佢哋舊年整體嘅董事酬金大約較前一年增加0.3%，但一班高層嘅人工有加有減，絕對唔係大鑊飯一齊食。
恒地主席李兆基（四叔）嘅「愛將」林高演，舊年維持約3,000萬元年薪，依然係恒地最高人工嗰位。加薪最勁係負責土地事宜嘅執董黃浩明，年薪大幅增加24%，到1,555萬元。
有加亦有減，被減人工最多嗰位，就係比較低調、主要負責內地業務嘅執董葉盈枝，佢年薪減咗17%，但依然袋走2,356萬元。
四叔唔似超人李嘉誠只拎幾千蚊，除咗以億元計嘅股息，佢舊年年薪1,888萬元，加4%。