國務院總理李克強為滬港通一錘定音後，港交所（388）行政總裁李小加忽然變得相當活躍，前日公佈商品產品，噚日又高調跟民生銀行（1988）就商品市場服務及產品展事宜簽合作備忘錄，今日又出席LME年會活動，仲話可能喺晚宴上上台表演助興，真係人逢喜事精神爽。
講資本賬拋金句
港交所周不時同其他交易所或機構簽備忘錄，通常出張新聞稿就算，好少召開記者會搞場大龍鳳。
不過，港交所噚日就為民行搞咗個記招，李小加致辭時透露，佢跟民行行長洪崎相識已久，但就冇講佢哋識咗幾耐，現場亦唔見兩人有好多交流喎。
咁究竟港交所與民行實際點合作呢？內地資本賬都未開放，資金未可以跨境流動，李小加就講書咁講，指合作要跟隨資本賬未開放嘅規限，希望幾年內可以做到互聯互通。
至於現階段要一步步發展，佢仲拋出金句話，「先有魚再有水，水多了魚也就多了」，唔知佢老友洪崎明唔明箇中道理呢？