馬尼拉人質事件終於暫告一段落，今次親身帶隊嚟道歉嘅馬尼拉市長埃斯特拉達Joseph Ejercito Estrada無功都有勞，但埃斯特拉達嘅受關注度，似乎唔及得陪佢嚟港嘅囝囝Jake Ejercito，唔少網民大讚Jake好靚仔，網上旋即瘋傳佢嘅消息同相片；來自賓賓嘅佢，風頭同一樣喺前日抵港嘅都教授金秀賢有得揮㗎！
埃斯特拉達前日抵達香港機場時，最吸引眼球嘅唔係佢架Rolls-Royce專車，而係企喺佢後面果位青靚白淨男。呢位美男子亮相後驚為天人，網民即刻做人肉搜索。查實佢係埃斯特拉達九個仔之一，名為Jake，今年24歲，曾經喺倫敦留學，報稱喺新加坡讀緊管理與政治學科。多媒體創作人健吾噚日都喺fb留言，引述高級知識分子同志朋友問喎，埃斯特拉達後面條仔咩人？「Model級喎」。可見Jake魅力非凡，唔輸蝕過都教授。
輕佻舉動捱轟
Jake抵港登上專車後，立即伸脷自拍並上載上社交網站；有報道話佢喺twitter留言"Anyone in HK right now？Hit me up!"，網民質疑佢公費旅遊。有指Jake明年畢業，雖然未決定係咪從政，但佢話過如果老竇畀個機會佢服務馬尼拉，咁就太好嘞。
Jake嘅俊臉迷倒唔少人，但佢喺商討人質事件解決方法期間，大晒嬉皮笑臉嘅自拍照亦惹嚟唔少人反感。最終佢刪文同刪相，喺twitter報道老竇同港府達成協議嘅消息補鑊。
mailto:[email protected]