近幾個月來，有關所謂政改諮詢問題，浪費咗香港大量人力、物力、時間精神，記得去年年中，有某大機構負責人問左丁山：「2017年普選，要有一個政改方案，我地係大機構，有冇需要研究對策？」左丁山當時大概係咁回答：「無謂浪費時間嘞，特區政府一定係要緊跟基本法第45條，拒絕任何其他民主派提出嘅方法，『提名委員會』在北京眼中，絕不可侵犯，不能讓步，故此有甚麼政改諮詢，都只係做一場大戲，貴機構不必花時間研究政改方案，做定『佔中』應變方案可也，呢啲contingency plan不可不做，否則管理層會俾董事會怪責。」
假如政府、西環與泛民能夠達成妥協，2017年特首候選人能有建制派以外一位人物嘅話，政改方案在立法會以三分二票數通過嘅可能性相當高，但北京堅持基本法第45條，提名委員會大晒，仲傳出消息話入閘競選可能要得到過半數提名，如果屬實，2017年大概只會有一個人可以入閘，係唔係梁振英玩晒呀？當選都殊不光彩啫。（按：民建聯在四月二十二日真係如是建議。）
左丁山最唔鍾意假道學，假惺惺，既然未諮詢已有一錘定音咯，林鄭、袁國強、譚志源做乜鬼還要扮諮詢騙人？坦坦白白話：「冇得傾，北京說了算。」大家還落得耳根清淨，駛乜搵甚麼內地法律權威（其實在國際上毫無學術地位）來港說三道四，又搵本地資深大律師（如莫樹聯）出口術吖，佢寫「香港家書」竟然話「提名委員會這制度的目的就是保障香港的繁榮穩定，和有利於資本主義的發展。」莫樹聯係大律師，唔係經濟師，講到「提名委員會有利於資本主義的發展」，真係笑死人唔使本，世界上民主選舉國家，全部實行資本主義，選舉程序或有不同，但呢啲國家何來有一個總統/總理提名委員會來保障資本主義發展？香港目前嘅政治制度，最保障「嫡系建制派」，如民建聯、工聯會，向資本家攞水，唔係保障資本主義。民建聯一個籌款晚會可以籌得6838萬，張曉明書法可以賣得1380萬，國寶級學術大師饒宗頤同樣寫四隻字只賣得200萬，就令人明白乜嘢叫做西瓜靠大邊啦，民主黨拍賣黃永玉畫作得30萬，都要俾人指為假貨，要回水呀！