近排轉趨高調嘅前財爺梁錦松四出講talk，政界猜度佢係咪為2017年特首選舉熱定身。噚日阿松出席教院講座，場內場外俾記者同學生追問係咪想選特首，佢回應話冇咁嘅計劃，但相信大家都好清楚，冇咁嘅計劃唔等於冇意參選，姑且聽住先。
教年輕人要識得輸
阿松噚日對住過百位學生、市民對話，雖然全程冇提過狼振英，但句句有骨兼到肉。佢教精年輕人，做人要識得輸、亦要識得贏，輸咗識企起身，否則重則跳樓，輕則變宅男。繼而指有才無德嘅人最危險，佢就寧願有德無才。八方即時諗起狼英經常遭批評恃才傲物。阿松又話，最好嘅領袖一定能夠吸引叻人團隊為佢效力，八方腦海即時一張又一張張志剛、吳得掂同馮煒光呢啲「叻仔樣」。至於政府理財哲學，佢話一人一票選舉制度下，有啲政府唔小心就會搞到嚴重赤字，使完儲備惟有舉債，即係攞埋子孫啲錢出嚟使，「為咗選票，政府會畀多啲福利，減多啲稅，唔夠錢就借」。