想知中國人有幾鍾意網購，留意一份調查就知。最近四大會計師行之一普華永道（PwC）公佈調查，指內地有14%中國消費者日日都網購，一星期一次嘅更高達60%，比全球5%每天網購、21%每周網購的比例高勁多，真係唔買唔舒服。
當全世界都講緊網購商機無限，你會發現Dior等唔少名牌，都唔肯於網上傾囊盡出，將所有貨掟上網賣。呢個問題，Chanel已答過無限次，而個答案一聽都覺得係high fashion先答得出，佢話「Fashion is about clothing, and clothing you need to see, to feel, to understand.」Fashion嘅嘢咁高層次，如果上網睇張相就feel到，世界就唔會有「穿Prada的惡魔」出現。查實網店最終目的都係希望吸引人去實體店。而實體店存在意義，就係吸引一群高質客戶入去，再提供一啲exclusive嘅產品。雖然放棄全力發展網購，可能會冇咗一個煲靚條數機會，不過對唔少品牌來講，銷售數字當然重要，但條數靚足10年又點？做cheap咗就玩完。
如果有個lady着咗件幾十萬嘅晚裝，之後有闊太話：「我喺邊個邊個網站見到呀，幾錢幾錢呀嘛。」一聽到都瘀到想喊。所以Chanel前數碼總監都話，品牌唔止着眼於數字，而係點令往後100年，都可以維持高貴形象。咁各位姊妹就唔好再怨名牌網購唔齊款了。
Fifi
本欄逢周二、四刊出