海迪早前回內地公幹，相約一百貨公司管理層吹水兼晚飯。在辦公室接待處等候時，發現在櫃枱的前後，堆滿了十幾廿個、大小不一的紙皮箱。一問之下，才知這些全部都是公司職員網購寄來的商品。有零食、化妝品、衣服，甚至連水果，連長腳蟹都有一隻。
Office樓下已經係百貨公司，照計每日放工要買嘢都好容易，但網上購物選擇多、價錢抵，儘管要冒一些可能會貨不對辦嘅風險，內地消費者仲係好buy。連百貨公司自己嘅職員都情願幫襯網購，你話影響點會唔大？
聞說近日內地網購已發展出「專門化」的趨勢，例如有專賣化妝品的「樂蜂網」，背後大股東是美國Walmart的網上超市「一號店」，在上海甚至連賣葡萄都有專門的網站「馬陸網」，由上海郊外的葡萄園直接送到府上。當地的朋友說，她想買即沖咖啡，早上在「一號店」落單，下晝就已經送到office。其他類型商品，大部份翌日都可以送到貨，真係唔使出街。
成日話內地網購潛力有幾大，咁到底香港有冇得做呢？有本港零售企業主管就同海迪講，過去一年佢哋有認真研究過搞網上微型超市，但最後發現，平均每運送一次貨物的人力成本，至少要40、50蚊，如要大搞，只怕以香港咁細嘅市場，好難維皮。
海迪