收埋唔少珍貴歷史檔案嘅特區政府，成日唔聲唔聲將啲檔案銷毀，反觀立法會就大方得多，絕大部份檔案都公諸同好，但係立法會個網頁就唔多好用，好多時想搵資料、搵文件都好難搵，十足一座失匙夾萬。
好彩立法會尚算從善如流，趁住下星期網頁改版，特別加強咗網頁嘅搜尋能力。譬如𠵱家想搵有關限奶令嘅資料、文件，除非你噏得出個學名《2013年進出口（一般）（修訂）規例》，否則你都唔使旨意搜尋到，但改版後，就咁打限奶令就ok喇，而且網頁內唔少資料都會作出整合，好似直播會議嗰一頁版面，會有更多會議相關嘅link，咁樣用起上嚟就更就手啦。