一單影星黃曉明豪送女友Angelababy超級跑車嘅娛聞，令大家知道嗰款林寶堅尼一手價370萬、二手價230萬元，想知多啲嘅，下月又有機會！
展期有限 免費入場
金朝陽（878）旗下位於銅鑼灣嘅金朝陽中心二期Midtown本月開始試業，為吸引人流，5月23日起設香港首個林寶堅尼珍藏館，為期四個月，不定期展出多架經典、特別版、甚至古董林寶堅尼，免費入場，車迷有福嘞。
林寶堅尼製造商創立於1963年，金朝陽今次係借呢架意大利名車啱啱成立超過50年舉辦展覽，到時仲會展出多張懷舊相片同埋模型，兼且列出所有生產型號嘅時序，再搞埋藝術活動同比賽。
銅鑼灣商場林立，競爭咁大，Midtown為打響名堂確實要出盡法寶，早前就高調宣佈搵來英國名廚Jamie Oliver嘅意大利餐廳進駐，令人期待。