正當新舊經濟混亂不堪之際，無嘢好得過就係將新舊經濟作長短打；無嘢嘅，炒股無「N稿」，都要為市場自製先至有得玩落去，係唔係？最緊要，係你對呢個板塊嘅信念有幾多，好似叫停咗「互聯網金融」，全部嘅新經濟股就即時跌到瞓街。
Prof J總係覺得，佢哋飛咗上天都咁耐喇，最緊要係落到地，在咁樣情況下喺堅實嘅平台再行過，就會更加健康發展啦！
科技改變消費模式
近排Prof J收到好多內地市政府及金融機構嘅邀請，要我講互聯網金融，證明呢個大方向已經成形，加上法規亦都慢慢走出嚟，你試吓叫停，講真，係「無得停」嘅。
好簡單嘅理由，因為科技改變咗我哋嘅生活。
Prof J識好多內地嘅老總，為咗迎合潮流，已加多嗰手提電話號碼，兼同我講，佢哋有用微信！真係似歌神話頭，「點到你唔服」！除非電話（phone）變返一個淨係講嘢嘅電話，否則的話，「互聯網+智能電話+無限嘅Apps+消費者模式改變」，去硬！
Prof J啱啱喺電視台嘅全新節目「徐時出擊」正式登場，都係《蘋果》嘅威力勁，讓我可以向更多粉絲朋友分享到炒股智慧同心得！
雖然係辛苦，但大家覺得清楚易明，而且夠直接，繼續努力！
Prof J喺高清節目中曾經講過電子商貿，其中物流業係非常之重要嘅一環，華南城（1668）同毅德（1396）都因為呢個「N稿」就爆咗出嚟！相反，由IPO到而家，Prof J定期追蹤嘅五洲國際（1369）大落後，可能管理層意識到呢個「資訊不平衡」，交到好業績同時轉型向電子商城，方向正確！
技術走勢方面，以大陽燭身一半做支持，破1.5大洋再加碼，希望「好心有好報」！出發！
徐燦傑
中國銀河國際財富管理主管
本欄逢周四刊出