受惠於W小姐的判決，阿Ben（化名）昨日正式和女友註冊結婚，即使經歷三年入院20次的痛苦，他仍然認為，應該完成整項性別重置手術才可以取得婚權，或至少去除原來的女性器官。他批評不願意接受全套手術的人，根本不是「真心」跨性別，「做一半，其實係TB（Tomboy）唔想要胸，根本唔係TG（跨性別），一個男人點可以容忍自己有陰道？點可以容忍自己姨媽到？」
年近40的Ben，昨午與女友在婚姻註冊處拉埋天窗，邀請城中爭取性小眾平權的朋友作見證，又在酒樓宴請親朋。走過十年手術苦路，他自言「冇忽好肉」，但認為手術是他尋回自己的有效方法。
「男人點忍自己有陰道」
回顧童年經歷，阿Ben說抑鬱是常態，「屋企人又唔明，成日諗係咪全世界得我一個呢？覺得自己好似上錯身，靈魂入錯軀殼咁，拎住張假身份證做人」。2003年底，他開始接受手術，成為全港首個以小腿骨做陰莖的人，「輪到我嗰陣咁啱『轉款』，2000年之前都係用隻手嚟做『僭建』，我就第一個用小腿軟骨嚟做，種尿道，我知道自己都係做白老鼠㗎喇，我接受㗎喎」。
手術後，尿液在傷口間漏出，陰莖的彎曲位置亦收窄，「因為女人個小便開口係向下㗎嘛，新嗰個陰莖要向上彎曲，等去廁所嗰陣可以向前，就係彎上嚟嗰個位收窄囉，𠵱家都未諗到方法解決㗎」。
三年內，他進出醫院20次，過去十年使用尿管，每晚都要取出清洗，但他「心甘命抵」，「就算死我都要做晒，女轉男，九成九都冇性生活，但我做手術係為咗搵番我自己，起碼𠵱家我肯影相，肯照鏡」。他對於只接受上身手術的女跨男者感到不屑，「做一半，其實係TB（Tomboy）唔想要胸，根本唔係TG（跨性別），一個男人點可以容忍自己有陰道？點可以容忍自己姨媽到？我識啲朋友（男跨女）未做手術前，就算有性行為，都唔會畀人見到自己器官，因為佢根本唔鍾意自己個器官」。
斥男跨女易濫用人權
他認為女跨男未必引起重大問題，但男跨女不然，「你話未切除陰莖，仲有鬚，話自己係女人，我完全接受唔到囉，去廁所一齊排隊唔舒服啦，將心比己，呢啲人係濫用咗人權自由」。
他指不少人一時衝動接受手術，之後卻後悔，「有啲突然間同伴侶嗌交，或者喺男人生活搵唔到自己，甚至可能係易服，就飛咗去泰國，去到好容易，做好晒（手術）先發現自己原來唔想做女人，咪自暴自棄囉，擴陰器又唔用，搞到下邊埋咗口，有啲接受唔到，咪自殺囉」。他認為近年社會對變性的接受程度提高，「但有啲人連變性都接受唔到，更何況係做一半（手術）？我哋呢啲做晒手術嘅都未搞掂，嗰啲做一半嘅又話出嚟爭，咁點掂呀？好亂囉，我哋喺唔正常中算正常，唔希望啲更唔正常嘅人搭沉船」。