從政嘅嘢，無永遠嘅敵人，當然都無永遠嘅朋友，因為投錯票而響朵嘅白鴿黨黃碧雲，可能仲未領略呢個道理。立法會婚姻條例修訂委員會噚日邀請公眾上去表達意見，一班性小眾友好團體早就約好發言之後出嚟發言，兩位本身係大愛同盟成員嘅立法會議員何秀蘭同陳志全都企埋一齊聲援，不過唔知點解，向來喺性小眾平權議題上失蹤嘅民主黨都派咗黃碧雲出嚟，令大家都好愕然。
黃碧雲無厘頭話民主黨本來支持政府提出修例，但聽完意見之後，覺得個草案兩頭唔到岸，佢哋要重新考慮，聽到大家一頭霧水。
唔知係咪佢平時慣咗次次開完會都同班泛民一齊扑咪，唔記得咗自己嘅黨友連反性傾向歧視條例都反對，早就同性小眾分道揚鑣。