港大校長換人，校方搞歡送會歡送徐立之，學生會又搞高桌晚宴宴請馬斐森。今期《學苑》訪問徐立之，提到原本有800幾人報名參加歡送會，點知一半人放飛機，出席嘅主要係校友，學生好冷淡，但徐校長話慣咗，勉強冇幸福。港大話嗰日飲唔晒嘅飲品留返，小食就分畀各部門同事，冇乜大嘥。
學生會就慘好多。以為馬斐森有吸引力，高桌晚宴安排咗250份餐，點知得200人嚟。港大學生會會長梁麗幗話，食物係向社企訂購，每份成本約180蚊，出席者每人畀200蚊，最終仍蝕12,800蚊，兼做大嘥鬼浪費食物，佢哋幹事會自我問責，喺facebook道歉。
港大近排咁多小風波，可能關百周年校園風水事。月初又有雀仔舂頭埋「窗」自盡，但物業處指雀為鼠，以為係死老鼠，叫工友執咗佢，冇通知漁護署執走化驗係咪有禽流感，搞到港大人又嬲又擔心。