中國光纖（3777）有阿爺keep住「寬帶中國」及澳紐剛啱搞緊嘅「國家寬帶」國策支持，集團又拍埋大孖沙合組戰略合作，繼續肥仔水，博中國光纖破頂再上。
中國光纖剛啱公佈冇耐上年度成績單，純利增長22%到3.3億銀人仔，兼且係五年歷史高位，PE得6倍，已經吸引到痹。而今年頭一份調查報告講，祖國農村寬帶人口普及率得6.3%，只達到城市人口普及率30%。諗到差距咁大，同寬帶硬件配套、網絡開放及服務未到位好有關係。亦即係話，中國光纖主打寬帶光纖活動連接器及配套產品，仲有好大發展空間。
明年PE僅4.8倍
中國光纖亦引用研究報告講明，主打瓣數，喺祖國今年市場總規模，會增加18%到近63億銀人仔。祖國市場繼續有景，中國光纖又係龍頭，國策食到應一應。
肥仔點只祖國市場？澳洲及新西蘭家陣亦如火如荼搞緊國家寬帶網絡到戶，投資規模分別高達2,900億港銀及100億港銀，2019年完成。中國光纖上年開始進軍澳洲，地區收入2,100萬銀人仔，佔總收入1.2%咁大把，但地區嚟緊幾年商機無限，嚟緊日子，應該爆炸。
再講，集團呢期又拍上對口係國資委嘅烽火科技，組成戰略合作，其中一項，就係拓展海外市場，中國光纖更加如虎添翼。
唔好計多，中國光纖今、明年度純利只係keep住22%增長，到4億銀及4.9億銀人仔，就算連上年配股攤薄全部反映，明年PE得4.8倍，值博率高，望到都流口水。博中國光纖破上個月頂2.39元，現價（2.01元）係咁意翻半番到3蚊，PE得7倍，未有耐追到烽火科技同年16倍PE。
錢雋
細價股專家
本欄逢周二、三、五刊出