色字頭上一把刀，從政者更要遠離。已婚荃灣區議員林發耿（圖），被揭疑與同鄉人妻有染，遭女方丈夫在家中放置針孔攝錄機，拍得二人肉帛相見，再遭女方丈夫親身向《明報》揭發，登上要聞版，傳遍政界。佢噚日接受本報查詢時，僅稱「唔好意思，呢個事情我唔想回應」，未及追問會否辭職，已經急急收線。
林發耿現年55歲，報稱係公司董事總經理，身兼福建省政協，1990年由福建來港定居，開五金公司，再加入民建聯，至2003年退黨，以隱形左派參選區議會，出任綠楊新邨區議員，之後在2007及2011年均高票連任，現為綠楊新邨業主委員會主席。
人妻丈夫有二人裸身片段在手，林發耿接受《明報》查詢時，稱會「盡量彌補家庭生活」，有需要時會向選民道歉。
但諷刺係，佢喺2006年接受《大公報》專訪時，講到同老婆好恩愛，多謝老婆打本畀佢創業，「我一生人中，最成功的事就是娶到一個好老婆」。