利福（1212）自2004年上市以來，話事人劉鑾鴻（細劉）一直都擔任董事總經理（Managing Director，MD）一職，公司噚日忽然宣佈，細劉要即時轉職銜，英文唔叫MD，要叫CEO，但中文唔係香港公司用開嘅行政總裁，而係跟內地企業叫做首席執行官。
上市公司董事改職銜呢回事，通常都係執董轉非執董，或者轉做主席之類，細劉無喇喇轉中英文名職銜，但其實一樣係話事人，確係幾無厘頭。公司解釋話，此舉可以更加有效表述佢喺董事會同公司嘅角色同職能，亦能與市場慣例接軌。
上網搜尋，美國公司較常用CEO，MD就英國公司用得多啲，兩者職能範圍冇乜分別，換言之，細劉唔係升職或降職。有趣嘅係，點解細劉嘅新中文職銜係首席執行官，唔通利福計劃再大搞內地生意，細劉換個內地人一睇就明嘅職銜對發展有幫助？