噚日朝早趁無會開較得閒，白鴿黨涂謹申就做廿四孝老竇，親自揸車接送囝囝信之去playgroup，點知佢去到觀塘繞道西行近麗港城附近，突然聽到一聲爆炸聲，然後佢架車嘅車頂，即刻被石頭擊中，令天窗破裂。阿涂話當時嘅爆炸聲好大，喺車廂入面嘅佢、太太同囝囝都嚇一跳。
阿涂架車係富豪，出名好鋼水，雖然座駕受損，但佢都覺得算好彩，事關只係咁啱擲中車頂中間嘅位置，有個天窗擋一擋，如果擲前啲又或者後啲，就可能係佢兩公婆、甚至坐後座嘅囝囝中招，所以都算走運，佢事後仲教咗囝囝，凡事都要感恩喎。阿涂事後花咗好多時間清理車廂，因為啲玻璃碎彈到周圍都係，要逐粒逐粒執番；而佢亦有報警，希望警方追查吓，究竟嗰度發生乜事，慎防再有意外。