做人要懂變通，李思欣眼見在無綫發展未如理想，兩年前開始投資副業，希望在商界一展拳腳。雖然是生意初哥，為了減低風險，她把積蓄分散投資，分別押在電腦店、火鍋店和賣鑽石生意上，思欣深明力不到不為財，早前修讀了鑽石鑑證課程，配合大搞網上賣鑽石，甚至親自接客促銷。
撰文：比華利
李思欣下月底便離開效力了10年的無綫，有見近幾年星途未見起色，她早密謀開拓副業覓出路，思欣入股的電腦零件及維修店、火鍋店都是多出錢少出力，因為她要留力重鎚搞好網上賣鑽石這盤生意，她親力親為招呼客人，又報讀鑽石鑑證課程，取得專業證書，方便以專業知識解答客人問題。
思欣跟很多女人一樣對鑽石愛不釋手，她與兩友人一拍即合，一年前合資約100萬在網上賣鑽石，她說：「我哋網頁有詳盡介紹，當客人睇到有啱心水，佢哋可以聯絡我哋安排睇貨，睇啱就成交。由於我哋唔係地舖，少咗捱貴租同其他開支，我哋嘅鑽石訂價比較平。我哋又唔使儲好多貨，客人訂先落柯打，咁樣成本唔使咁高。」
靠口碑薄利多銷
畢竟創業艱難，思欣為了開源節流，在佐敦分租了僅100呎的小型辦公室見客，訪問當日，思欣拿出近日客人訂購的一批鑽石，當中分別有一卡、兩卡圓形鑽石，以及四卡心形鑽石，總值約300萬。思欣用放大鏡逐一鑑證，手勢純熟。到底怎樣分辨優質鑽石？她教路：「一粒靚石要睇4C，即係cut（切割）、color（顏色）、clarity（淨度）同carrat（卡數），基本佢哋證書都清楚列明。我哋來貨主要來自南非，亦有經印度同以色列加工嘅鑽石。客人揀啱鑽石，我哋仲有鑲嵌服務。」
思欣表示暫時以港客佔多數，大部份靠口碑來幫襯，她說：「盡量想做到薄利多銷。」過去一年的生意額達七位數字，思欣覺得滿意，她說：「遲啲生意好啲，我哋想搬間大少少嘅showroom，始終唔使同其他公司分租，客人上嚟睇貨會舒服好多。」
鑽石人妻思欣手上只見卡地亞婚戒，未見戴上耀眼巨鑽，正是賣花姑娘插竹葉，問她是否憑經驗等待特級巨鑽才叫老公范振鋒送？思欣坦言：「老公好搞笑，佢話鼓勵我做呢門生意，等我睇多啲，睇厭咗就唔使叫佢買。」
