當學民思潮嘅黃之鋒都有齣《未夠秤》喺戲院上映中，阿里巴巴創辦人馬雲又點會冇一齣講阿里成長過程嘅電影呢？製作公司Taluswood Films噚日公佈，一齣名為《Crocodile in the Yangtze：The Alibaba Story》嘅阿里紀錄片將於5月28日全球公映。呢套戲早於2012年參加過國際電影節，揀正阿里計劃今年赴美上市先至公映，似係幫手造勢囉。
呢套戲嘅導演Porter Erisman曾經擔任阿里國際行銷和商業開發副總裁，喺大約兩分鐘嘅電影預告片入面，主要講馬雲多年前發起搞阿里，由英語老師變成科網巨頭嘅經過，N年前嘅馬雲相當青澀，但已經係口水多過浪花，台上演講都冇話怯場。上市前拎套戲軟銷，相信冇幾多間公司做得到！