俾網民封為「燈神」嘅「大埔LuLu」董嘉儀，啱啱簽咗新經理人公司，諗住喺娛樂圈發展，當時佢肯定自己單身，又話自己嘅擇偶條件一定要鍾意睇波。點知噚日有雜誌踢爆LuLu同一個六呎高嘅男仔，好sweet咁喺銅鑼灣拍拖，個男仔又搭佢膊頭，LuLu又從後攬住佢，之後再齊齊坐的士走人。
拍拖四年
事後LuLu接受雜誌訪問，大方承認拍拖：「佢係廣告導演，喺網上拍過啲短片，但係唔出名，我哋感情好穩定，結婚過幾年先啦，我仲細，得20歲！」不過有啲網民似乎唔多like LuLu講大話，呢頭講完單身冇男友，轉個頭又認有個拍拖四年嘅男友，最緊要係兩件事相距得嗰十日八日，口風變得咁快，又好難怪大家有咁嘅反應。噚日LuLu喺電話度話：「多謝大家關心，其實一直都有個圈外嘅穩定男友，冇話唔講得，只不過大家仲細，想以事業為重，希望大家畀啲空間我哋！」問擔唔擔心影響女神地位？佢話：「唔怕，一直大埔嘅賽事我同男友都有一齊去睇，好多朋友知道，同埋想做好啲工作，唔係淨係做女神。」
撰文：馮仁昭
