都是facebook惹的禍！立法會主席曾鈺成個fb，前晚突然被發現，主席大發慈悲，share咗一條鹹片「造福」網民，即時惹嚟各界迴響。雖然曾鈺成透過立法會發言人回覆，話自己身在日本，對此事不知情。佢之後仲喺fb貼咗賞櫻照，暗示事件同佢無關。但啲網民話喎，fb邊度都上得，唔代表鹹片事件唔關主席事喎。但曾經捲鹽花風波嘅馮檢基同何俊仁，都力撐曾鈺成咁精明，點會公然灑鹽花咁蠢？
刪片再貼京都照
查實得知條鹹片喺網上瘋傳後，曾鈺成個fb已經拿拿臨刪片，其後佢仲透過發言人話不在港、對事件不知情。噚日仲特登喺fb貼相，自爆身在日本京都，話當地大部份櫻花已經謝咗，但景色依然好怡人，似乎想澄清人不在港、唔關佢事？
但有網民好質疑曾鈺成呢個欲蓋彌彰嘅做法，一嚟曾鈺成始終冇解釋過點解fb有呢條link？二嚟就算唔喺香港都可以上fb啫。佢噚日上載到遊日本啲相，即係證明佢上到fb啦。當然亦有人覺得佢個fb被黑客入侵，又或者係助手惹的禍咁話囉。
兩位捲入鹽花風波嘅男士，一致力撐唔關曾鈺成事。民協馮檢基fb嘅「最新動態」，之前被揭睇過兩條鹹片，阿基事後力證佢同四個管理fb嘅助手都冇睇過，懷疑被「惡搞」。阿基同八方講，通常議員啲fb戶口密碼，唔只自己有，佢覺得曾鈺成個戶口都係被盜用，唔係佢上載嘅，笑笑口話醒目如阿曾，唔通敢公開share鹹片咩？
被揭喺預算案睇𡃁模艷照嘅白鴿黨何俊仁就話，「我就話矇查查啫，曾鈺成咁精明，唔會俾人公開睇啲鹹片嘅」，AV仁深信曾鈺成唔會咁做！不過呢，呢期中日關係緊張，有網民就話，阿曾主席喺呢個時期遊日本，政治覺悟性似乎有啲不足喎！嗱，呢樣嘢，就真係冇得賴人啦！
mailto:[email protected]