力爭13連勝嘅香港「神奇小子」曹星如（Rex），為咗喺5月31日澳門舉行嘅「金光羽戰」拳賽有好成績，上周日就去到菲律賓首都馬尼拉進行地獄式訓練。不過，幾勤力都要唞吓氣，Rex噚日就出席賽事記者會，拜會同樣會喺澳門出戰嘅「菲律賓閃電」多納爾，仲乘機向對方偷師。
Rex偷師爭世界冠軍
多納爾係傳奇拳王帕奎奧嘅同校師弟，贏過4個不同級別嘅世界冠軍。Rex噚日遇上呢位31歲前輩，笑到四萬咁口，仲俾多納爾講笑話佢好似成龍㖭。
前輩咁勁，Rex當然要乘機向佢偷師啦，佢話：「多納爾嘅過往佳績媲美帕奎奧，所以希望可以向佢請教步法，同埋點樣進行相關特訓嚟爭奪世界冠軍寶座。」
Rex喺超蠅量級別對戰日本嘅角谷淳志，而多納爾就會挑戰現任世界拳擊協會（WBA）羽量級世界冠軍維特耶卡。多納爾噚日就喺記者會上面，用李小龍名句「Be Water」嚟形客當下嘅心情，同時希望同擔任教練嘅爸爸拍住上取勝。