《福布斯》中文版噚日公佈今年華人富豪榜，一如所料，隨住過去一年濠賭與科網股喪升，即使最近稍為回軟，相關股份嘅市值依然水漲船高，影響唔到銀河娛樂（027）主席呂志和與騰訊（700）創辦人馬化騰喺榜內嘅排名節節上升。
呂志和最新憑住220億美元（1,716億港元）淨資產，喺福布斯華人富豪榜排第二，首富咪又係超人李嘉誠，呂志和2013年喺呢個榜只係排第十，轉眼跳到第二，將原本排第二嘅恒基地產（012）主席李兆基，踢落第三位。
另外，內地首富嘅萬達集團董事長王健林，與舊年「股王」騰訊老闆馬化騰就一下子打入十大，分別以151億美元同埋134億美元淨資產，排第五同第六位，新鴻基地產（016）大股東郭炳江與郭炳聯兩兄弟都係排第七咋。不過，呂志和就認為身家暴漲「做人還是要平常心，不要看財富後面多三個零還是四個零」。