民建聯上星期一個籌款晚會上，中聯辦主任張曉明大展歌喉，成功籌1,100萬元；寫一幅書法，就得到世房（813）主席許榮茂欣賞，咁又籌多1,300萬。好多人會諗，同場「漢學大師」饒宗頤兩幅墨寶，夾埋亦只係籌到380萬；就算係「曉明大哥」黃曉明親筆提字都唔值，更何況係來自「張曉明大叔」？唔好玩啦。
核突啲講句，就算張曉明放底「幾両金」去拍賣，相信都有人願意用重金去投！現時阿爺打貪。出面橫風橫雨，邊個仲敢好似華潤咁，一餐飯食150萬；出錢畀人去滾，又遇正掃黃。就算係本來有任務在身的情婦，現時風頭火勢，都唔敢亂咁行動「發掘商機」。有錢無地方使，年終慳唔少，但同時要於有限空間內「撈本錢」，用千幾二千萬散紙去擦吓鞋，濕濕碎。 更何況現時枱底錢唔可以花得太明顯，為交功課，枱面錢就要相對使得多啲，為阿爺賣一個漂漂亮亮的賬。政治獻金嘅嘢，由以往收收埋埋，現時因時勢，被迫借呢類公開場合揚開，反正這是籌款，你又吹佢唔脹。
目前中央打貪重點在國企，先鎖定電訊、石油、華潤三大系，最新又有國家能源局核電司司長郝衛平被查，反映下一個打貪重點移至電力行業。雖然唔知今次打貪對「中國電力網絡」影響有幾大？會打低幾多隻大老虎？但肯定會有電力國企高層捲入，各位股民小心。
Fifi
本欄逢周二、四刊出