上星期本欄講幼稚園經營，一位已經退休嘅老友打電話嚟講：「你知我退休前係辦幼稚園嘅啦，我啲仔女無意做呢行，而且佢兩個都留在紐約、三藩市做i-bank，唔肯返嚟香港，所以我退休前就將幼稚園轉為非牟利，收政府學券，轉咗俾一個團體辦落去，繼續照顧啲學生。如果你左丁山願意投資搞幼稚園，我可以『侵本』，仲可以做埋你嘅幕後顧問，辦註冊攞牌，實賺㗎。」
老友H話政府派幼稚園學券，每學童現在每學年一萬七千五百元，2014/15派二萬多一啲，2015/16派二萬二以上，冇資產審查，趙國雄個仔都可以申請攞得到，但只派入讀非牟利學校。啲私立幼稚園、國際幼稚園等等，全部非非牟利，學費可以任收，每個月收三千幾至四千多係等閒事，老友H嘅非牟利幼稚園現時每月只收學費二千元以下，家長扣除學券後，每月只係交學費幾百蚊。
既然非牟利幼稚園便宜咁多，點解啲「牟利」學校還是咁多學生，辦到成行成市呢？例如睇上星期「壹週刊」，就提及天水圍之「德怡幼稚園」原來由一個德寶教育機構創辦於1978年，旗下有25間幼稚園及國際幼兒園，分佈於將軍澳、大埔、黃埔花園，以至深圳，創辦人陳漢彬與校監勞慕雯係好有經驗嘅物業投資人士。咁嘅一個龐大物業／幼稚園機構，話佢唔識乜嘢係市值租金，講都冇人信。
非非牟利幼稚園教育機構發達，皆因香港家長不願子女輸在「起跑線上」，80後小師奶L今年六月臨盆，已收到不少同學朋友電話，教足佢點樣去申請幼兒班幼稚園，如果要入St. Catherine，就要及早預備喎，其實師奶L乜嘢叫做St. Catherine都唔知，只係諗住攞學券啫。但又有一位80後媽咪話俾佢聽：「唔好蝕底呀，個仔上午讀本地非牟利幼稚園，攞學券，每個月頂多再出幾百蚊學費。下午就送個仔入國際英文幼稚園，交三千幾蚊學費，咁就可以幾乎全日托兒兼且令個仔同時學齊中英文。」唔怪得幼稚園啲「客路」不愁啦，吳克儉都俾所謂「幼稚園學額不足」搞到頭暈，唔怪得老友H話肯支持左丁山申辦牟利幼稚園也！