前經濟發展及勞工局局長葉澍堃第一粒乖孫喺復活節假期前搶閘出世，話係搶閘，事關葉澍堃呢個孫仔原本預計喺5月頭先出世，應該屬於金牛座，點知佢唔鍾意金牛座，係都要做白羊座BB，通常大家一講十二星座，都會先講白羊座，白羊座嘅人又好鍾意競賽，咁仲唔係搶閘？
葉澍堃長子葉瀚林（Hiram）係美資行賓架，2012年底結婚，BB仔上周二出世。聽Hiram所講，成件事都幾突然，佢哋當日原本約咗醫生做產檢，未上診所就感覺到BB要出世，於是嗱嗱聲搵埋醫生飛車去養和生仔。咁啱葉澍堃跟太太去咗中東旅行，上周三返到香港就即刻去醫院探BB嘞。
BB仔英文名叫Chris，貪呢個名簡單好聽，中文名仲等緊爺爺葉澍堃去改，Hiram唔係因為八卦要為阿仔改個大富大貴嘅名，而希望意思好，最好有水、有土，趁番個姓咁話。