恒大地產（3333）喺復活節長假期前宣佈，執行董事李鋼今年5月1日起辭職，以便投放更多時間喺個人事務。翻查聯交所資料，李鋼辭職似乎都係早有部署，見佢本月1日開始不斷行使手上嘅認股權，然後分批沽貨，至今套現1.27億元，扣除成本，賬面賺超過3,400萬元。
李鋼年約50歲，根據恒大年報，佢全面負責恒大資金同埋合規方面嘅工作，包括籌措資金、法律事務、審計等等；佢年薪僅次於行政總裁夏海鈞，2012年袋走超過3,700萬元人民幣，可見佢幾咁位高權重。
此外，佢大約有4,300萬股認股權，而佢就係喺呢個月初不斷行使跟手沽貨，一個星期左右已經沽走3,308萬股，平均價介乎3.821元至3.891元，套現逾1億元，只係剩低1,000萬股未沽，唔知佢會否臨走前沽盡呢？