【專訪】
美聯物業（1200）出現股權爭奪戰，作為主要競爭對手，中原地產主席施永青接受專訪時，卻從往事說起。他說，中原同美聯最初所謂「中美大戰」，是一個策略部署，令公司地位可以同美聯併齊。
「喺一般人心目中，唔上市一定係差過上市，嗰陣我拍檔阻我令中原上唔到市，於是我策動中美大戰補救，將一間冇上市嘅公司，可以同有一定地位嘅上市公司鬥，咁你都有一定地位，呢個係搭美聯順風車嘅策略」。他坦言，「我叫中原着數好多，一定係中美中美……咁我咪行喺佢前面囉」。
美聯兵變，流彈誤中中原，事緣第二大股東APEX引述中原數字，質疑美聯業績，惟美聯大股東黃建業反駁中原數字未必準。施永青回應，「佢哋話我哋條數未經審核，香港有限公司都要經核數師審核」，他表示，非營業部人工跟公司盈利掛鈎，只要你問到員工的花紅有多少，再按中原發花紅的公式推算即可，「我哋都經過核算，不過就冇交俾美聯核算，啲同事問：施生，怕唔怕傳出去，我曾經講中原啲業績可以俾對手訂購、訂閱，我咪俾個賬佢睇囉」。
奉行無為而治 小才大用
他這樣形容現時的「中美關係」，「𠵱家贏佢多唔多？正常情況都係贏佢廿零三十個percent，啱啱市唔好，美聯今次蝕咁多，我都有少少意外」。但他指，一般上市公司都有習慣，就是「衰嗰年衰晒佢，留番好嗰啲嘢好嗰年用」，下一年便容易反彈，「我唔係講美聯，我話一般上市公司咋」。
1978年成立中原的施永青說，當年搞地產，資本投資花了5,000元；2005年搞免費報紙，用了8,000萬元。對於為何較少見中原有內部問題。施說，用人方法是無為而治及小才大用，他解釋，給予普通人都有機會發展，中原同事大部份都是「散仔」開始，「你成日覺得自己大才小用咪成日想轉工，我唔揀人嘅，好少主觀判斷邊個得邊個唔得，對自己可以諸多要求，對人哋唔得嘅，睇唔順眼都照用，唔輸俾行家就得」。