西貢糧船灣呢幾日都好熱鬧，噚日就有2,000幾人登島，因為「媽娘」要出巡。其實媽娘就係平時大家聽慣嘅「天后」，糧船灣鄉民習慣咁稱呼，就正如台灣人叫天后做「媽祖」、澳門就叫「媽閣」咁。農曆3月23日為天后誕，糧船灣就會喺之前一日，即農曆3月22日，每兩年舉行糧船灣媽娘出巡盛會一次，今年就係2013年天后宮修葺後首次盛會。糧船灣旅歐同鄉會創會人江水生話，今年有200人喺英國返香港慶祝，佔旅歐人數三分一。江水生話，今次鄉民夾咗200萬蚊，出動50艘遊艇巡遊，期望政府可以重視天后誕，好似長洲太平清醮搶包山活動咁，成為特色旅遊，吸引遊客咁話。