中信集團注資中信泰富（267）、實現整體上市的具體方案，上周三收市後正式揭盅。當日中信集團舉行記者會，有記者的提問，令董事長常振明一度語塞：「到底這宗交易，創造了甚麼價值出來？」這答案，只怕你翻遍那355頁的通告N次，亦很難想得出來。
一句講晒，呢單交易，是破壞價值，多於創造價值。集團今次收購的資產，根本就不足以抵銷發行大量新股後的攤薄影響，作價亦唔吸引。以去年底的備考數據睇，新中信合併後的每股資產淨值，就要大減38%。幸好在交易公佈前，出咗單「滬港通」，令市場開始撈底中資股；而是次收購的資產中、佔有一定比重的中信証券（6030），亦因為咁而受惠，急升咗一轉。時機真係巧合到無倫。
合併後的新中信，逾80%資產和盈利，都是來自金融業務，而當中大部份又是來自已經在港上市的中信銀行（998）及中信証券。
所以，新中信想sell自己是一隻在各主要板塊都有平衡exposure的股份，又或者業務性質有互補，理據恐怕有點薄弱。斷估投資者唔會為了要有國安足球隊/海上直升機服務嘅exposure，而買中信啩？
海迪