喺香港，補習學校為咗賺取家長嘅錢，塑造咗好多星級名師，估唔到家陣連大學都可以用星星分級。一個名為「中國校友會網」嘅內地組織，發表咗一年一度嘅「中國大學評價報告」，其中一個排行榜專為港澳台三地大學而設。結果顯示，香港有三間大學躋身六星級別，澳門大學都有五星，仲跑贏咗香港嘅浸會大學同樹仁大學，呢兩間只得三星。
獲得六星嘅包括港大、科大同中大，同反服貿男神林飛帆所讀嘅台灣大學齊名。至於五星級別，香港冇一間大學入到，反而見到澳門大學。香港嘅城大、理大、浸大同樹仁，都只能躋身四星同三星級。
評審參考港大民研
睇落個分類都幾難理解，根據報告，六星大學係指「辦學層次」屬於「中國頂尖大學」，五星係「一流」，四星係「高水平」，三星就「知名」。而成份報告最大亮點就係分級標準，報告話，港澳台地區大學嘅評審標準，除咗參考英國泰晤士高等教育世界大學排名同英國教育組織QS世界大學排名之外，仲睇埋香港大學民意研究計劃。
八方好感動，多年來一直被《大公》、《文匯》呢啲熱血愛國傳媒質疑嘅港大民研計劃，終於獲得內地機構認同。至於報告中嘅港澳兩地大學分級，喺城大畢業、澳大教書嘅教授仇國平就一言以蔽之：「睇完咪算囉！」佢話內地好多大學排名報告，而選擇去港澳升學嘅內地學生，最重視嘅未必係大學級數，而係讀完書可唔可以留低搵工甚至攞到身份證；呢樣嘢只可以喺香港做到，澳門唔得。
mailto:[email protected]