馮仁昭四圍超：范萱蔚淡出娛圈秘婚 - 馮仁昭

馮仁昭四圍超：
范萱蔚淡出娛圈秘婚 - 馮仁昭

喺08年加入樂壇，成為裕美師妹嘅范萱蔚（Percy），當年成日孖住同門高皓正、葉文輝同埋賈曉晨（JJ）出席大大細細嘅活動，仲曾經因踢爆同門JJ假拍拖造新聞，鬧出唔少風波。無幾耐Percy就喺娛樂圈「人間蒸發」，列入失蹤人口名單，原來佢當年約滿後，淡出娛樂圈，轉投化妝師行列。

范萱蔚喺08年加入樂壇，近年淡出娛樂圈做化妝師。資料圖片

Winkie代報喜

淡出幕前嘅Percy，擔任化妝師嗰陣，亦同唔少藝人有聯絡，前晚佢嘅好姊妹HotCha嘅Winkie喺Instagram貼咗一張三個人嘅合照，仲留言話：「我親愛的Percy小姐與她的未來老公！」原來今年Percy將會同拍拖六年，做私人教練兼舞蹈員嘅男友結婚，佢喺年初已經同啲朋友公佈呢個喜訊，上兩個月仲影埋婚紗相㖭，見到Percy嘅狀態比做歌手嗰陣仲省鏡，睇嚟佢都好滿意𠵱家嘅生活！
撰文：馮仁昭

范萱蔚同未婚夫化妝影婚紗相，不忘自拍晒恩愛。互聯網圖片

Winkie（中）前晚喺Instagram上載范萱蔚同未婚夫嘅合照。