商台DJ甄子康（少爺占）和太太Tina結婚八年，兩人首個愛情結晶品於大前日凌晨出世了！囝囝取名甄和天（Timmy），重6.6磅，現年37歲初為人父的阿占，昨接受本報電話訪問，他指囝囝比預產期遲了幾日出世，他笑說：「打後有幾單賺錢job，我叫佢唔好出世頂住先，佢真係頂到，好乖仔。」
妻痛逾20小時
由於兩夫婦決定自然分娩，18號凌晨4時許，占嫂開始出現陣痛，阿占還冷靜地叫太太食東西、沖涼、洗頭，朝早9時許才送太太到柴灣東區醫院，之後更親睹太太經歷十級痛楚，阿占說：「到第二日凌晨3點幾出世，媽咪痛咗20幾個鐘，真係好似地獄，佢嗌到似驅魔人上身，聞笑氣都冇乜用，我話不如無痛分娩，但醫院唔鼓勵，老婆撐多幾個鐘，慘叫聲隔兩堵門都聽到，我乜都做唔到驚惶失惜，心痛到好似冇咗忽肉，好在生嘅過程尚算順利，女人真係好神奇，生咗好精神抱BB仲話：『好得意喎！』」
阿占有否親自幫囝囝剪臍帶？他說：「冇，怕剪得肚臍唔靚，第一眼覺得囝囝似自己，口好大，臉型細尖，耳仔似活佛大耳珠，鼻就似老婆。做老竇感受好夢幻好開心，𠵱家放兩星期假，想佢似我樣多啲，我都幾粗暴對待佢，食人奶瞓着就大把摑佢。」阿占還寫信給囝囝，並放上社交網：「人生，have fun！好好玩一場！爸爸曾經害怕長大，但能夠看見你一天天地成長，我的生命也像重新燃點起年青的火苗了。」
採訪：皓騫