藝人生涯原是夢！香港電視開台屢次觸礁，不單令觀眾少了一個選擇渠道，同樣亦令不少藝人的夢想破滅，結果有人選擇吃回頭草，繼續過着被投閒置散的生活；有人選擇做藝人之外的工作，除了給自己一條生路外，亦等待隨時在娛樂圈東山再起！入行15年的港視藝人陳少邦，去年10月加入健身教練行列，他說：「𠵱家睇吓健身教練呢份工啱唔啱做，我依然想拍嘢，但係喺呢個時勢，都要試吓呢份工。」
撰文：何慧斯
港視藝人陳少邦前年毅然離開無綫，轉投港視從頭開始，誰不知新公司一波三折，開台不成，惟有另覓出路，幸好本身對健身有興趣，去年10月加入健身教練行列，訪問當日正值與同事切磋訓練，見到他一身肌肉，相信過往下了不少苦功，阿邦說：「其實我玩gym都有10幾年，中間亦都有做過教練，我喺呢間club教咗半年，𠵱家叫做試吓可唔可以有另外一啲發展。」
「我好似小強」
現時阿邦一日都有三至五個客人上堂，間中亦有接司儀和唱歌的工作，可以維持到生計。初初上堂教學生，難免會遭到白眼，他說：「開頭上堂佢哋都係抱住懷疑嘅心態，但係試過之後知道我唔係流，其實做藝員好多嘢都可以試，只係睇你行唔行得過嗰個關口。」
與學員關係亦師亦友，學生亦替他打氣，問阿邦是否有一股暖流？他笑說：「係㗎，感覺到，佢哋同我講，如果真係要去拍嘢，唔緊要，可以就我，等我得閒啲再補堂，完全support我，仲話如果有一日唔教，冇所謂，反而戥我開心。」經歷過事業的高低，現階段對於阿邦而言，未算有太徬徨的感覺，他說：「我諗𠵱家個心態應該頂得好多嘢，好似小強（曱甴）咁。我唔鍾意玩過山車，但係𠵱家偏偏似過山車，我覺得可以頂得住，就算再有難關，應該可以解決到。」
最近阿邦在舊公司的舊作獲得不少人讚賞，本來港視亦計劃拍一部劇集，據聞以同性戀為題材，他的戲份頗多，可惜現今開拍無期，甚至已拍的作品亦播映無期，問他會否覺得頗為諷刺？他說：「都冇辦法，喺呢個時間播番套劇，叫做有啲迴響，即係話畀自己聽，做藝人都得喇，我拍嘢都有人睇，唔係冇人鍾意。」問到他有否後悔過檔？他坦言：「我去邊唔係大問題，我本身鍾意拍嘢，所以先會入訓練班。後悔係好辛苦，人嘅心理係要承受好多嘢，唔好迫到自己咁辛苦，我相信有啲嘢，上天係一早安排好。」
今年11月阿邦將會約滿港視，至於將來的去向，他說：「要諗嘅嘢都已經諗咗，𠵱家睇吓健身教練呢份工啱唔啱做，到時先再作打算，我會想拍嘢，但喺呢個時勢，都要試吓呢份工，保住收入，最緊要團火未熄，等機會再搏！」
化妝：Tiffany Tong
髮型：Ray Hui@RH
場地提供：Leap
