內地小生文章自偷嗒姚笛嘅照片被曝光後，形象破產，仲被翻舊帳指佢唔係第一次出軌，有傳早喺姚笛之前，文章已同陳妍希撻着。雖然事後文章已喺微博上公開認衰仔，仲話想彌補過錯，但大批網友仍抨擊佢辜負咗太太馬伊琍。
事發後，馬伊琍曾喺微博寫上「戀愛雖易，婚姻不易，且行且珍惜」，及後佢都係轉發微博為主，未有再同粉絲網民交代近況。直到本月七號，馬伊琍再「公開」同大家見面，當時佢喺微博貼咗張素顏，喺火車上餵囡囡食人奶照片，並寫道：「妹妹在火車上是這樣吃飯的，期待火車上也有。」
之後馬伊琍仍有玩微博，至前晚佢就自爆朝早九點從夢中驚醒，佢話：「夢裡是和初中同學道別，萬分不捨和哭泣，醒來後驚訝地發現今天是4月20日，25年前的今天，初一的我們在昆山春遊，爬山時發生小小險情，我們5個女生結成深刻的友情，此後每年這一天都寫信給《笑聲與歌聲》點播歌曲為紀念這一天，從未如願。現在，我們各散東西︳友情仍在！」
至昨午，馬伊琍再更新微博，佢貼咗張正在化妝照片，原來不經不覺佢已經停工14個月，昨日重返工作崗位了，馬寫道：「停工14個月，今天重返崗位！」
另外，文章同馬伊琍0依家重歸於好，但同第三者姚笛之間的關係，外界就不得而知，姚笛至今仍保持沉默。
日前有傳媒爆料，今年文章籌拍自己的導演處女作，女主角本來敲定姚笛，但因為文章向投資方，開出逾億拍攝資金，由於資金龐大，投資一方拿不定主意，再加上爆出偷食事件後，令該片拍攝已無限期壓後。據內地傳媒引述知情人士話，爆出偷食事件後，文章曾邀請一啲電視台朋友食飯，仲話當面敬酒拜託佢哋繼續「關照」姚笛，該知情人士認為文章同姚笛間感情，比外界想像還要深喎。