近日MK-Pop用嚟形容有獨特跳舞技巧及歌藝嘅歌手同組合，而娛圈湧現唔少MK-Pop，香港代表有天堂鳥同FAITH，內地就有拾音社等，天堂鳥更被喻為香港MK-Pop嘅天團。有網友列出一張亞洲MK-Pop名單，包括香港、澳門、台灣同越南等地，雖然天堂鳥貴為香港MK-Pop天團，但正所謂「道高一尺，魔高一丈」，佢哋最終被網友一致裁定輸畀嚟自越南嘅男子組合HKT！
呢隊被網友喻為世界級嘅HKT由三個有特別衣着技巧嘅男生titi、kiet同hung組成，佢哋梳咗個N年前MK男生最愛、遊戲《拳皇》內角色八神庵嘅髮型，本身髮型同造型已經冇得輸，再加上佢哋嘅MV《Nang kieu lo buoc》竟然喺墳場上跳舞，騎呢程度爆燈，難怪輕易秒殺天堂鳥。
旺角霸位受阻
另外，天堂鳥噚日喺旺角快閃跳舞，雖然喺自己地頭表演，兼搵埋師姐同廿位女dancer伴舞壯聲勢，但呢隊MK-Pop天團因為霸位問題令表演一度受阻，講到今次表演嘅原因，佢哋話主要係想推動音樂：「畀大家認識我哋另一面，就係冇化濃妝！」
撰文：馮仁昭
