【電玩巡場】世界盃搶先開戰　《Titanfall》大熱

仲有個幾月，巴西世界盃就開幕，球迷們當然熱切期待，而最強足球Game《FIFA》當然亦唔會錯過四年一度的搵錢機會，承勢推出《2014FIFA巴西世界盃》，近日已經到港，黃金商場Game舖寶源賣$398。店員就話隻Game未算熱搶，一來可能始終仲有個幾月先到世界盃，熱潮未到最高點，二來《FIFA14》都只係出咗未夠半年，Game迷們都預計新Game改變不大。

另外要數呢期大熱Game，就非《第3次機戰Z時獄篇》同《Titanfall》（XBox360版)莫屬，前者多年來儲落超多Fans，頭幾日一間Game舖賣最少賣過百隻；後者玩法新、口碑好，記者採訪當日除寶源外，亦有幾間舖已賣清，要等到下星期三再入貨，可算是XBox近年代表作。