近年朱古力品牌Kit Kat勁受歡迎，因為佢經常都出好多唔同口味，所以好多遊客都會買嚟做手信，特別係上月推出咗一隻烤布丁味Kit Kat，甜品廚師高木康政拍埋片示範，只要將朱古力開封，放入焗爐，用1000W熱力焗2-2分半鐘，咁就搞掂。
睇廣告嘅「叮成品」包裝，真係超吸引，好多人都問香港幾時有得賣。唔使問啦，某數字品牌連鎖店貨已入，好多潮人已經經歷咗無數次失敗，一係焗爐Watt數唔夠，變成一pat米白色嘢，零分重作；亦有成功者貼圖話：「終於成功，好甜，好似食緊焦糖咁，其實唔係真係好好食。」亦有人分享成功心得，就係用標準1000W焗爐，攝氏250度焗2.5分鐘，毋需預熱，搞掂！不過記住要MON實個爐，睇下有冇燶呀。
原來除咗烤布丁味，仲有一隻朱古力味；同烤布丁製法一樣，只要將佢焗2分鐘，朱古力面就會有一陣燒焦咗既朱古力。潮人阮小儀都試將KitKat放入焗爐，人哋試白朱古力味，佢就試原味，仲話效果好好，影埋張相比大家睇，話:「當大家都試焗白色嘅時候，其實佢朱古力原味都好好味呀！」咁就真係要快啲試下喇！