以富二代身份自言「成功須苦幹」而紅遍網絡嘅玩具大王蔡志明囝囝蔡加讚（Karson），除咗積極學習做生意，近年更開始涉獵政壇，除咗同唔少建制二代籌組「香港政協青年聯會」，好多政治場合都見到佢嘅影蹤㖭呀！
好似上星期二民建聯嘅籌款晚會咁，Karson成晚唔單止坐喺主家席，仲要全程傍實四粒墨寶值千萬嘅中聯辦主任張曉明，成為當晚最矚目嘅傍友「新星」，一致被認定上位在望，恨死唔少坐邊皮嘅親中人士。
據聞Karson之所以成功進佔呢個咁有利嘅位置，確實因為佢有「父幹」。因為蔡志明捐咗唔少錢，所以獲回饋呢個靚位，代父出席宴會嘅Karson，自然唔使爭就有機會坐正，所以話呢，呢個世界上有啲人，成功都係須「父幹」多啲囉。